政情：戴澤良 崔如琢譜30年佳「畫」
近年北京當代國畫大師崔如琢嘅畫作，喺拍賣會上屢創逾億元天價，吸引唔少收藏家注意。早幾日崔如琢來港出席一場拍賣會時，同佢相識卅幾年嘅中華廠商聯合會副會長戴澤良（Tony）專程去探佢。Tony話，三十幾年前佢同崔如琢喺美國紐約萍水相逢，獲當時仍未成名嘅崔如琢贈送一幅畫，自此兩人失去聯絡，估唔到如今崔如琢身價暴升，諗起幾傳奇。
在美求學認識 臨別贈畫
Tony話，當年佢喺紐約讀書同崔如琢相識，佢好欣賞崔如琢嘅字畫，兩人亦頗為投契。後來Tony到美國其他州份求學，崔如琢託一位朋友帶幅畫作送畀佢。Tony一直留喺身邊，返港後仲裱起掛喺屋企。直至近年佢聽聞崔如琢嘅畫價破億，覺得個名熟口熟面，上網一查見到崔如琢，即認得呢位故人，查看家中幅畫嘅落款，果然係大師大名，Tony都覺得係一段奇遇。
