九月立法會選舉臨近，佔領中環發起人戴耀廷早前就發起「雷動計劃」，希望非建制黨派協調立法會選舉名單，但搞咗咁耐仍然係一潭死水，無他嘅，事關喺依家四分五裂、各懷鬼胎嘅泛民陣營，想協調到真係好天真。點知民協就「皇帝唔急太監急」，主動提出想協調，尋日仲去信畀各個泛民政黨、青年新政同學民新政黨，希望相約會面。
民協主席莫嘉嫻話，建制派以往配票成功，但泛民好多時都得票多、議席少，愈多非建制派政團參選，對泛民愈不利。民主動力早前開過會，認為應該「先易後難」，先協調超級區議會，但莫嘉嫻話唔協調地區直選，攞唔到過半數議席好難影響議會，所以民協對此有好大保留。佢又話，好多政團都唔支持協調，只係擔心實質操作，所以希望逐個政黨約見游說。
民協咁落力，皆因協調對佢哋弱勢最有利，簡單啲講即係唔使同咁多人爭飯食。雖然各大泛民黨派表面上都話不妨傾傾，但講明要其他政黨同意推行先肯落水。其實唔肯落水不特止，部分黨派更向民協大潑冷水，工黨李卓人就話對協調唔多樂觀；公民黨梁家傑亦都話，雖然動機良好，但執行有好多問題，似乎各方都唔多睇好。