政情：金像獎政治化 馬逢國中箭
每年一度嘅香港影壇盛事金像獎頒獎典禮啱啱喺星期日舉行，最佳電影落入獨立電影《十年》手中惹來熱議，成為不少市民茶餘飯後嘅話題，甚至變成政治風波，令體育、演藝、文化及出版界立法會議員馬逢國惹上失職嘅指控。原來事件起因係佢作為金像獎評審之一，竟然無睇電影兼無投票！
歸咎拉布嚴重 無時間睇
對於有意見指，馬逢國要為最佳電影獎項「孭鑊」，佢就話講法好笑，因為自己當晚以觀眾身份入場，事前完全唔知邊齣電影得獎，所以睇不到自己與獎項有何關係，亦唔明要負上咩責任。佢話，內地對敏感電影發行同題材都有一定制度及規矩，所以有香港電影無法喺內地上映並非新鮮事。
佢又話，金像獎有運作多時嘅完整評審準則，應該尊重評審決定，難以指評審想借得獎電影作政治表態，佢認為一切爭議應該由主辦機構去解釋。佢借奧斯卡頒獎典禮都有爭議為例，指出不同人對得獎都有不同看法添。佢仲自爆，未有睇過《十年》，有機會都想睇，佢歸咎近期立法會事務繁重，亦因為近年「拉布」嚴重，以致可以睇電影嘅時間極少，連電影發展局嘅電影都只可以睇剪輯版咋！
「睇得少 投票會造成不公」
正因為佢睇嘅電影數目太少，擔心投票對入圍電影造成不公平，所以金像獎評審之一嘅馬逢國呢兩年都選擇唔投票，強調自己係負責任嘅評審，揚言「無理由睇都唔睇就投票」，仲話係原則問題。
估唔到政治化趨勢蔓延金像獎，馬逢國「未睇過，無投票」都不幸中箭，真係難以想像下屆金像獎會發展成點？