中環出更：譚榮邦自爆買股無申報捱鬧
近日民政事務局常任秘書長馮程淑儀與富商換樓醜聞令各界嘩然，喺官場打滾幾十年嘅新民黨中委譚榮邦亦透露，佢曾有一段疑涉利益衝突嘅經歷。譚榮邦憶述，九十年代初時任財經事務及庫務局前身、金融科副首長時，眼見當時滙豐銀行股票好抵買，隨即入咗一手，諗住買入後先向上司申報，但礙於金融科工作與股票市場息息相關，結果被上司鬧到面懵懵，呢件事提醒佢做事一定要避嫌。
女校男生 葉劉師兄
譚榮邦解釋，「炸彈」就喺身邊，公務員嘅避嫌工作一定要做到足，否則後果可大可小。咁佢嘅滙豐股票下場點呢？佢就苦笑話：「跌到咁都冇眼睇囉！」另外，好多人都知道身兼行政會議成員及立法會議員嘅新民黨主席葉劉淑儀愛邀請公務員團隊精英過檔，其中譚榮邦除咗係公務員精英外，與葉劉亦早有淵源，佢預科時轉讀聖士提反女子中學，做葉劉嘅師兄，更加係該校首批「女校男生」。未知譚榮邦當年身為女校嘅稀有品種，係咪特別受女生歡迎呢？
卓妮