中環出更：歷屆總理聚餐 仁濟39年首次
成立咗三十九年但一直無運作嘅仁濟醫院歷屆總理聯誼會，經過一年來嘅籌備同奔波尋人後，終於喺三百位歷屆總理之中，搵番八十八人重返仁濟大家庭，早前就舉行恢復運作嘅首次會議及聚餐聯誼。「失散」幾十年嘅舊人重逢，既開心又不勝唏噓。聯誼會主席蘇陳偉香話，明年係仁濟成立五十周年，董事局已展開籌備活動，希望到時齊集新舊總理之力，令仁濟大家庭更壯大豐盛。
難得返歸嘅前總理包括曾做鐘錶生意嘅順全有限公司主席李福生，仁濟前主席王忠秣見到佢即上前寒暄一番，兩人好似開舊生會咁雀躍。李福生話，佢於香港回歸前加入董事局，早前收到聯誼會嘅「尋人」信件，於是返來繼續支持兼見吓老友，佢仲讚王忠秣卸任後一直好有仁濟心，係佢學習嘅榜樣。
蘇陳偉香繼續「尋人」
久違嘅「舊生」仲有港澳台灣同鄉會名譽會長兼香港佛光協會創會會長林耀明，佢憶述當年與仁濟結緣，緣於有次佢幫手撮合星雲大師為仁濟籌款，後來仲入埋董事局做總理添！
同場仲有做過主席嘅趙曾學韞、羅嘉穗、何杜瑞卿、嚴玉麟及董吳玲玲等人，啱啱於四月一日卸任嘅前主席林煒珊亦成為新鮮熱辣嘅聯誼會成員。蘇太話，雖然已搵番咁多人，但仍要繼續努力。佢正籌備帶大家去越南胡志明市享受美食之旅，順便去佢間做代工嘅鞋廠參觀，滿足吓老友們對製鞋嘅好奇心。
卓妮