城門失火，殃及池魚，內地假冒偽劣產品氾濫成災，食品安全毫無保障，疫苗更加靠唔住，搞到人心惶惶，連香港都受到拖累，講起真係可悲。
係咁嘅，最近山東揭發特大黑心疫苗醜聞，網上瘋傳一份「帶孩子去香港打疫苗全攻略」，詳列本港各母嬰健康院嘅地址、電話、手續同收費水平等，令人擔心香港繼奶粉荒後，隨時又出現疫苗荒。衞生署急急補鑊，宣布轄下母嬰健康院優先服務本地兒童，至於非本地兒童預約名額每個月就限制一百二十個，有需要時甚至會全面停止添。該署官員承認，過去一星期非本地預約數字上升，由過往每日幾宗增至超過一百宗，其中粉嶺及九龍城等十二間母嬰健康院嘅三月預約更加爆滿。
事實證明，「帶孩子去香港打疫苗全攻略」唔係講笑，真係有內地家長響應（口架），衞生署話就話本地疫苗庫存充足，但如果唔採取措施，出現疫苗荒一啲都唔出奇。老實講，母嬰健康院優先服務本地兒童係天經地義，好似澳門咁吖，衞生局採購嘅疫苗只免費供應畀澳門居民，唔會為非澳門居民接種，旅客只能自費接種屬於緊急需要嘅疫苗，例如破傷風疫苗等，反觀港府依家至亡羊補牢，始終都係後知後覺。
唔係危言聳聽，今次係內地歷來最大宗嘅疫苗衞生醜聞，幾百萬劑黑心疫苗銷往二十四個省巿，涉案金額高達五點七億元人民幣，家長唔擔心就假。試諗吓，內地有咁多細路仔，如果一窩蜂湧嚟香港打針，你話點樣應付呢？
講到底，近年假冒偽劣產品遍地開花，內地當局必須負起最大責任。就講疫苗問題吖，已經唔係第一次出事，而且曾經搞出人命，可惜國產官僚一直闊佬懶理，尤其係呢單案件跨越六年咁耐，去年已被公安部、國家食藥監總局列為督辦案件，仲入選二○一五年度公安部打擊食品藥品犯罪十大典型案例添，但當局一直遮遮掩掩，最近至向社會公開，問你服未。難為世界衞生組織仲大講風涼話，指呢批疫苗安全風險非常低喎，你信唔信吖？除非冇經濟能力，否則邊個家長會畀子女做白老鼠？
所以話，矛盾皆因官禍起，近年中港矛盾不斷惡化，本港激進組織搞事固然係主要原因，而內地當局亦難辭其咎，如果唔係監管失職，放任奸商謀財害命，內地人唔使捨近求遠跑來香港掃貨，就唔會被人視為蝗蟲，亦唔會引發各種矛盾及衝突。講起真係諷刺，家陣中國貴為全球第二大經濟體，科技發展一日千里，但偏偏搞唔掂小小疫苗，都唔知好嬲定好笑！