政情：公民講場：申辦美食車 蘇錦樑刁難

美食車計劃講咗成年，尋日終於出台，但只批出十六架美食車牌照，仲要兩年先接受一次申請。唔單止咁，申請人要經過兩階段評審，首先係評審計劃書，包括其主題、財務及業務等，第二階段就接受烹飪挑戰賽，勝出先獲發牌，唔知仲以為係「食神」爭霸戰。另外，美食車外觀設計亦喺考慮之列，而獲發牌嘅美食車唔可以喺經營期間取消售賣入選美食，而參賽時嘅食物分量及價格亦要保持不變，唔可以參賽時用大大份和牛，賣嘅時候改用其他材料。攞個美食車牌照都要過關斬將，主責嘅商務及經濟發展局局長蘇錦樑似刁難創業者多啲囉！