政情：工展會搞網購吸內地客
內地網購發展迅速，唔少內地人習慣以網購代替去實體店舖購物。中華廠商聯合會（廠商會）籌辦工展會多年，喺兩岸四地亦曾舉辦工展會，推廣本港品牌，原來最新大計都係涉足網購，打算舉辦「網上工展會」。
李秀恒吳永嘉互撐選立會
廠商會副會長兼展覽服務公司主席戴澤良尋日喺傳媒午宴上話，唔少人喺工展會購物，之後都會致電查詢喺邊度可以買番嗰啲產品。
廠商會依家正在籌備網上工展會，第一個目標係深圳前海，下一步可能會喺武漢、橫琴、廣州等地開展。形式方面，就係設立實體店舖展出本港產品，想買嘅人睇完可以喺網上買，至於會用邊一個網購平台，就視乎該地區最多人用邊個，並無規定。
另外，盛傳廠商會會長李秀恒（Eddy）同副會長吳永嘉（Jimmy）都有意競逐廠商會立法會代表議席，Eddy就話未考慮係咪參選，會支持所有有意參選嘅副會長，但又唔能夠話有副會長參選，自己一定唔選。Jimmy就話，佢支持Eddy同所有有心有力服務嘅人，而自己就樂意喺任何適合嘅崗位服務。呢一刻大家都咁禮讓，唔知遲啲會點呢？