立法會每逢開大會期間，秘書處都會為議員提供午餐、晚餐及茶點水果。呢啲費用亦會由議員共同分擔，而剩餘嘅食物亦會捐贈畀註冊慈善團體「膳心連」。不過，原來喺過去三個立法會會期，一眾議員都化身成「大嘥鬼」，每個會期都剩餘超過七百公斤嘅食物，相等於超過七十包十公斤嘅米，難為呢個世界有人無飯食。
根據立法會秘書長回應議員有關立法會開支嘅提問，自一三年開始，秘書處會將議員所剩低嘅食物捐贈畀「膳心連」，用作轉送有需要人士。而喺一三至一四年度嘅會期，所捐贈嘅食物重達七百六十一點三公斤。其後喺一四至一五年度嘅會期，雖然所贈嘅食物已減至七百三十點五公斤，但仍然係超過七百公斤。
至於由去年十月起截至今年二月，立法會捐贈嘅剩餘食物則重達三百一十二點五公斤，現時會期只過咗一半時間，若照現時情況，今個會期需要捐贈嘅剩餘食物應該唔會再多達七百公斤。不過，食剩嘢始終都係壞習慣，一眾議員唔做「大嘥鬼」當然係最理想啦！
卓妮