面係人哋畀，架係自己丟。復活節假期過後係清明節，相信唔少港人都會出門旅行放鬆吓，不過玩還玩，至緊要奉公守法，如果因為一時貪念而惹上官非，自作自受事小，影衰香港事大吖。
有辦你睇，一名中年港女上月底去台灣旅行，喺台中機場櫃台購買一張價值一百元新台幣嘅悠遊卡，趁店員唔為意，竟然將原本用來付款嘅一千元新台幣鈔票連同找回嘅九百元新台幣一併攞走。最騎呢嘅係，今個月初港女離開台灣時，鬼使神差到同一櫃台向同一男店員查詢另一張悠遊卡嘅退款事宜，結果唔使問都知，港女自投羅網，被當地警方依法處置。
大家睇到嘞，一張悠遊卡不過港幣二十幾元，並唔係值錢嘢，咁都要貪小便宜，唔止無品，簡直無恥。貪字得個貧，港女今勻出醜台灣，自取其辱都算嘞，至弊係連全香港人都一齊受罪。好簡單，今後香港人遊台灣，人哋會點樣睇我哋呢？
冇錯嘞，一粒老鼠屎可以搞壞一鍋粥，何況老鼠屎唔止一粒咁少。好似去年超強颱風「杜鵑」襲台，竟然有香港旅客冒住暴風雨攀石被困，勞駕當地消防員冒險拯救，多謝無聲不特止，其中一名港女仲惡言相向，鬧人哋係垃圾喎。到底垃圾係邊個，心照喇！
咁仲唔止，最經典要數兩名「威震」台灣嘅港女租霸，佢哋將當地租住嘅單位搞到七國咁亂，之後租都冇交，拍拍籮柚就走人。做租霸都算嘞，最離譜係又食又拎，連電視機都偷走埋。呢單嘢當年轟動全台，兩位瘟神被收監之餘，仲被永久禁止入境，你話身為香港人，係咪面目無光吖？
講開又講，台灣向來係港人嘅旅遊熱門勝地，唔少港人對台灣人零舍有好感，覺得佢哋比內地人文明。可惜吖，台灣人就唔係咁睇嘞，早前至有記者撰文，講述光顧牛肉麵店時被港客打尖嘅經過，批評香港人一啲都唔文明。
所以話啫，香港人經常自覺高人一等，動輒炮轟「強國人」無禮貌、不文明，不屑與之為伍，其實只係五十步笑百步，內地人有嘅毛病，香港人幾乎都有，最多係程度不同嘅咋。本是同根生，相煎何太急，即使有啲人口口聲聲話自己係香港族，仲要搞獨立添，查實香港人同內地人基因一致，血濃於水，簡直係難兄難弟。
一句到尾，人必自侮而後人侮之。香港人又好，內地人又好，出門旅遊必須謹言慎行，入鄉問禁，最緊要遵紀守法，事關一言一行唔止影響自己，仲影響成個族群，大家都唔想出門旅行時被人歧視杯葛吖，係咪？