立法會議員葉劉淑儀自一一年正式創立新民黨後，一直密密向各方招兵買馬，包括變相收購咗有多名區議員嘅沙田地區政團公民力量，令該黨區議員總數一度增至有近三十人。然而經過去年底嘅區議會換屆選舉後，該黨嘅議席數目有所退減，其中葉太喺根據地港島區亦損兵折將，加上下屆立法會港島區由七席縮至六席，令人擔心佢有連任危機。消息指，葉太最近又開始招兵行動，游說現為獨立人士嘅南區區議會主席朱慶虹入黨，但朱慶虹已經拒絕咗，究竟點解呢？
朱慶虹接受本報查詢時話，自己同葉太識咗好耐，對方覺得佢形象專業同中產，同新民黨好合襯，希望佢入黨幫手備戰九月立法會選舉。可惜朱慶虹所屬嘅置富選區，有好多來自不同階層人士，區內街坊一向唔鍾意有政黨背景嘅人士做議員，覺得獨立人士先能夠持平處理區內事務；加上南區區議會有來自不同黨派嘅議員，佢以獨立身份主持會議，協調上比較方便，所以只好婉拒葉太邀請。不過亦有消息指，其實喺過往嘅選舉，朱慶虹亦有幫過新民黨拉票，因此入唔入黨實質影響唔大。