政情：工黨「耆」招搶票 撈過界扮激
面對多個年輕本土派及傘後組織威脅，多個傳統泛民黨派都加速年輕化，唯獨係身為泛民第三大政黨嘅工黨，九月立法會參選名單依舊由現有三名老將擔頭。其中何秀蘭已年過六十，李卓人同張超雄亦已年屆五十九歲，難以獲取愈嚟愈重要嘅年輕選民支持。最近該黨頻頻「撈過界」，喺多個非勞工議題上搏盡扮激，反映佢哋都開始感受到「被消失」嘅危機。至於班年輕選民會否因而棄新取舊，投票畀該黨嗰幾位老人家，大家等多幾個月就會知！
被年輕網民譏「大中華膠」
工黨自一一年成立以來一直主打勞工及基層議題，其主席李卓人長期兼任支聯會領導層，副主席張超雄則致力協助新移民，被一眾右翼年輕網民視為「左膠」及「大中華膠」。工黨講本土議題就輸畀公民黨，講激進又輸畀另一左翼政黨社民連，同一眾主張港獨及勇武抗爭嘅年輕本土派及傘後組織，更加係完全冇得比。
最近該黨似乎想改變形象，首先係立法會財委會喺一片混亂中通過高鐵追加撥款後，人民力量同公民黨先後表明會提出司法覆核，其中人力更預告最快會喺本月十八日入稟，但工黨卻搶閘喺早一日派出執委鄭司律，就有關司法覆核申請法援。雖然鄭司律聲稱係以個人身份提出覆核，但該黨多名老將當日都做晒「攝石人」，全程陪住鄭司律上法援署填表爭曝光，「打尖」都打得肉酸過人。
之後教育局局長吳克儉出席一間位於天水圍嘅中學活動，離開時突然遭上百名該校學生、舊生同校外人士圍堵。大家初時仲以為事件係由本土派團體發動，但其後鄭司律上電台自爆當日佢亦在場，強調抗議行動係由學生與舊生自發策劃，而佢本身正係該校舊生，聲稱同政黨無關喎！
關注骨灰龕變抗議泥頭山
到近日引起全城關注嘅天水圍「泥頭山」事件，一向關注有關問題嘅土地正義聯盟（土盟）到場挖泥抗議本來正常不過，最奇嘅係關注開骨灰龕問題嘅工黨成員謝世傑亦有參與，李卓人更喺警察嚟晒後先到場，令人質疑兩人撈過界抽水博拉。恨見報恨成咁，睇嚟真係有好大危機感。