中環出更：范國威傳棄超選 推黨友做炮灰
俗稱「超級區議會」嘅立法會區議會第二功能界別合共有五席，被視為政治含金量最高，泛民及建制派都互不相讓鬥餐死，其中泛民陣營方面，新民主同盟（新同盟）最近不惜今日嘅我打倒昨日嘅我，積極考慮派人出戰超級議席，但據聞新同盟立法會議員范國威（Gary）經過一輪考慮後，決定留守新界東直選，寧可推黨友、知名度差一大截嘅大埔區議員關永業做炮灰出選超級議席，關永業會否慘敗而回，答案似乎不言而喻！
或由關永業頂上
政圈消息指，Gary傾向留番喺新東，由關永業頂上出選超級議席嘅關鍵，在於票源相近嘅立法會前議員鄭家富，考慮後決定九成九唔會「再作馮婦」披甲上陣，而喺冇後顧之憂下，Gary留喺新東勝算較大，競選所需資源亦較少。
另一方面，關永業於黨內超級議席爭奪戰，由後備變為正選亦有迹可尋，事關新同盟近日落區時，唔少易拉架已事先張揚，「你是否贊成新民主同盟派出大埔區議員關永業競逐超區議席」。之不過，關永業喺無天時、地利及人和之下，能否成功上位，答案似乎係困難多多嘞！