中環出更：鄧鉅明唔憂滬迪園搶港生意
上海迪士尼樂園於六月中開幕，最近掀起一陣撲飛熱潮，而另一邊廂，籌備多年嘅日本北海道新幹線亦於日前通車，政商界名人會唔會心郁郁跳出香港去體驗一番？太子珠寶鐘錶主席鄧鉅明話，有意試坐北海道新幹線，但唔會急於一時。而外號「快勞夾大王」嘅杜振源透露，兩個月後會再抱孫，因此計劃等埋個孫出世先齊齊去新主題樂園玩。
尋日係一連四日復活節假期嘅最後一日，卓妮於沙田馬場見到唔少名人，當中唔少人都好鍾意外遊同埋試新嘢。對於今年中開幕嘅上海迪士尼樂園，鄧鉅明話，個仔之前好鍾意去香港嘅主題樂園，自己亦覺得樂園入面睇煙花特別靚，不過個仔依家可能大個咗，上年開始就冇乜興趣去，加上預料內地人均會湧去上海新開嘅主題樂園，因此暫時冇意同人逼咁話。
鄧鉅明又話，完全唔需要擔心上海嘅主題公園搶香港生意，因為大家特色唔一樣，但佢認同香港可再發掘多一、兩個有特色嘅大型旅遊景點。
杜振源為孫女去樂園玩
同場仲有國際文具集團主席兼行政總裁杜振源及小母牛香港籌款委員會成員鄧慶治，其中杜振源話，以前唔會去主題公園，但自從有咗孫女後就不時一齊去，依家仲擁有全年通行證。當問及會否同鄧慶治一家人組團去日本坐北海道新幹線，杜振源話可能五月先成行喎！
冇戴眼鏡一改平時「四眼look」嘅沙田區議會前主席韋國洪，尋日亦有現身。佢透露，早排喺六樓廂房望落沙圈屏幕，睇唔清楚啲賠率同數字，笑言「登六」後對眼唔好，醫生叫佢做白內障手術，手術後依家連近視都冇埋，睇嘢唔使戴眼鏡都好清楚。
卓妮