成日話香港效率高、生活節奏急促，其實好多時只不過係錯覺咋，輪公屋、輪街症固然等到頸都長，家陣連機場等攞行李都分分鐘搞成粒鐘，真係少啲耐性都唔掂。
唔係講笑o架，有網民早前喺網上討論區貼文，問點解近年喺香港機場等行李嘅時間愈嚟愈長，引發熱烈討論，有負責處理行李嘅職員大呻近年請人困難，「請十個走十一個」，搞到四個蓋要冚十六個煲，負責一架小型客機又係咁多人，負責A380又係咁多人，結果搞到手忙腳亂，乘客領行李仲塞過紅隧，唔知多少乘客激到媽媽聲。
香港機場行李託運甩甩漏漏，早就唔係今時今日嘅事。機管局過去兩年接獲約一百宗有關行李處理延誤嘅投訴，淨係一四至一五年財政年度期間，就有高達百分之七嘅行李未能喺指定嘅四十分鐘內送達行李認領處。早排有國際組織公布全球最佳機場調查，香港由去年嘅全球第四跌到落第五，被排第一嘅老對手新加坡進一步拋離，而喺各項排名中跌得最甘嘅，正正就係「最妥善運送行李」呢一項，由舊年第二跌至今年第八，真係跌到阿媽都唔認得。又係嘅，機場作為一個城市嘅名片，旅客一落機等攞行李等餐懵，已經谷到成肚氣，對當地都唔慌有好印象喇。
機管局又點解畫呢？發言人承認行李送達認領處嘅時間，會受天氣情況、人手調配等因素影響而延誤，又話會定期檢討行李處理流程，並同航空公司及服務營辦商商討改善辦法，但對外界最關心嘅人手係咪嚴重流失以及實際人手編制等避而不談。嗱，呢啲咪文過飾非囉。正如有工會人士話齋，機場人手追唔上不斷增加嘅客量，特別係行李處理員底薪平均只有九千至一萬二千元，加上機場交通費又貴，上落班時間又長，難以吸引新人入行，呢個問題一日唔解決，講乜都係嘥氣。
話時話，機場管理烏煙瘴氣，點止處理行李混亂咁簡單吖。淨係保安漏洞已經可以數到天光，仲有民航處高官大花筒，將機場大樓搞成羅馬大浴場、愛妻練舞室，仲有耗費巨資嘅導航系統得物無所用，簡直係沒有最醜，只有更醜，排名唔跌跌不休至奇喇，至今冇爆大鑊，都要劏雞還神咯。
見微知著，香港機場國際排名由獨佔鰲頭落到今日三甲不入嘅境地，其實亦係整體旅遊業無以為繼嘅縮影。都係古人講得啱︰莫以善小而不為，莫以惡小而為之，要省靚香港招牌，由改善機場管理做起；至於改善機場管理咯喎，就梗係從妥善處理行李做起喇！