學民思潮早前宣布停止運作，前召集人黃之鋒承認日後會同部分成員組新政黨。被指將會代表政黨出戰九龍東嘅學民思潮前發言人黎汶洛（Oscar）近日頻頻現身，唔單止成日出席公開場合，更加積極寫網誌關注唔同議題。尋日就趁復活節假期促政府盡快將「勞工假」同「法定假」睇齊。不過，有人就質疑仍然係學生嘅Oscar連工都未返過，就學人爭取假期？
有人話，佢咁做係為咗選戰，目標係九龍東嘅勞工嘅選票。咁講亦都不無道理，事關Oscar唔止一次提過勞工議題，好似農曆新年時，佢就同前學民成員周庭去狙擊工聯會理事長吳秋北及會長林淑儀，質疑工聯會喺全民退休保障問題上「走數」。Oscar雖然被林淑儀鬧佢無家教，但仍然為佢喺網上博得唔少掌聲。Oscar今次再次針對勞工議題，唔知係唔係食髓知味呢？