政情：容海恩容永祺冇親戚關係
一啲比較少見嘅姓氏，喺同一個機構或界別入面，好易惹人誤會有親戚關係。盛傳會代表新民黨喺九月出戰立法會新界東選舉嘅大律師容海恩（Eunice），係香港專業及資深行政人員協會（專資會）創會會員，咁啱同專資會創會會長容永祺嘅姓氏一樣，唔通佢哋有親戚關係？
同屬專資會 被人問到怕
Eunice笑笑口話，好多喺專資會啱啱相識嘅人，見到佢張卡片上面嘅姓氏，就會問佢同容永祺有冇親戚關係，其實兩人唔係親戚，每次Eunice都會否認，但都覺得好尷尬，擔心會惹人誤會添！不過，中國人成日形容同姓嘅人「五百年前是一家」，所以外界好奇都好自然，惟有希望大家以後唔好再問Eunice呢個咁尷尬嘅問題喇！