政情：徐英偉「星」級親子假期
一連四日嘅復活節假期今日結束，政商界中人於幾日紅日假期各自各精彩，其中民政事務局政治助理徐英偉（Caspar）一家四口飛咗去新加坡度假，尋日於社交網站上載到當地環球影城嘅「打卡」相片，當中Caspar同太太好合拍，齊齊戴上太陽眼鏡，而兩歲幾嘅細仔最幸福，可以全程安坐喺BB車，近五歲嘅大仔就要做「步兵」喇！
另一邊廂，Caspar嘅同事、商務及經濟發展局副局長梁敬國（Godfrey）選擇留港「還債」，尋日一家三口就留喺旺角一個商場戲院，連睇兩套分別於早上近十一時同下午三時上映嘅卡通動畫電影。
梁敬國孖愛女過「卡通日」
Godfrey形容，尋日係自己嘅卡通日，又話囡囡鍾意睇由迪士尼製作嘅一齣卡通片，既然都出得去睇戲，最後決定打孖上一次過睇兩套卡通動畫，實行做跟得老竇咁話。