政情：鍾國斌擺李慧琼上枱
工商界政黨自由黨被視為建制派「壞孩子」，向來唔撐特首梁振英（CY），該黨主席兼紡織及製衣界議員鍾國斌（Felix）尋日出席一個論壇時，再次表明如果CY用依家咁嘅施政方法嘅話，係唔會支持佢連任，其後又忽然搗亂隨處點火頭，高調鼓勵現年四十二歲、生肖屬虎嘅立法會議員兼民建聯主席李慧琼（Starry）參選，莫非有人為求反CY，真係可以不顧一切，即使要擺其他人上枱都在所不惜？
頻點火頭 曾踩CY表現最差
自由黨同CY唔咬弦，於政圈係公開嘅秘密，Felix自從接任黨主席後亦繼續走呢個路線，最強火力係於去年八月，曾稱同前兩任特首比較，CY係至今表現最差嘅一位，而尋日出席一個電台論壇時，Felix除咗一貫唔撐CY連任，更首度鼓勵早前辭任行政會議成員嘅Starry參選特首。
仲記得Starry嘅黨友葉國謙，曾經話過黨內臥虎藏龍，有好多符合出任特首條件嘅人選，Felix喺論壇上借題發揮，話Starry本身屬虎，「臥虎喺我隔籬」，表明鼓勵對方參選特首，又盼望有女特首上場改善香港情況。
Felix其後進一步解釋，話本港跨黨派都支持發展政黨政治，加上女性領袖亦係世界大趨勢，所以Starry參選對社會係好事，可以多個選擇，不過，Felix之後都戴番個頭盔，當問及如果Starry真係參選，自由黨會唔會投票畀佢時，佢則稱要視乎對方嘅政綱同能唔能夠團結建制派等。
李聞言反應大：嘩！搵我過橋
Felix忽然於特首選舉呢個敏感議題搗亂，擺Starry上枱，而且同Starry早前公開表明出年唔會參選特首嘅立場一百八十度相反，自然得唔到當事人嘅認同，Starry當場嘅即時反應亦好出奇，直言「嘩！搵我過橋」，又強調無論係咪支持CY或其他參選人，都唔應該以性別作重點考慮，反而應該考慮嗰個人能唔能夠團結建制派、點處理深層次矛盾、市民支持度、中央信任度及其團隊人選等。
話時話，自由黨為咗同CY唱反調，真係無底線，唔知下次又會借邊個過橋搗亂，達到佢哋路人皆見嘅目的呢？