中環出更：鄧家彪划艇 不復當年勇
香港可以玩水上活動嘅地方唔多，來來去去都係得沙田城門河。尋日就有團體邀請立法會議員馬逢國及鄧家彪（Bill）到啟德避風塘試玩龍舟同划艇。Bill曾經係中大划艇會代表隊，早前佢仲自爆勤練健身操弗自己，不過現場所見，佢喺水上面划艇熱身時姿勢十足，但係一上岸玩划艇機時，一分鐘先划得二百九十米，連當年入隊一分鐘划三百米嘅最低要求都達唔到，明顯不復當年勇喇！
讚啟德避風塘水質靚
Bill特登着件中大划艇會T恤現身，明顯想趁機威吓。佢話，讀書嗰時經常喺城門河訓練，啲水係黑色，水質好差，相比之下，啟德嘅水質好靚。佢又話，曾向大會打探過，使唔使同人鬥快划艇，對方答佢只係普通試吓水示範啫，所以佢先至鬆懈，無盡全力練習喎！不過講真嗰句，雖然Bill划艇成績的確無當年咁勁，但係同其餘三名選手比，都贏咗幾十米嘅！
馬逢國划幾下鬆膊頭
落場划龍舟嘅馬逢國話，近年議會拉布令佢周身骨痛，仲有埋肩周炎，今次落水划幾下，膊頭即刻鬆番啲喎！
卓妮