中環出更：AI不停步 商界添煩惱
早前人工智能（AI）程式AlphaGo總局數四比一勝韓國圍棋高手，成為一時熱話。「熨斗大王」東保集團主席陳鑑光（Charles）話，人工智能應用廣泛，尤其係用於家電產品方面已係大勢所趨。生產力促進局主席劉展灝（Stanley）亦話，相信未來唔少工種無可避免會被人工智能取代。不過，電訊數碼執行董事張敬山就擔心，若持續發展下去，人工智能一旦超越人類指令，或會為人類帶來威脅。
Stanley話，現時好多勞動嘅工作無人肯做，好似佢間錶廠好多工序已經自動化。近年醉心學揸飛機嘅Charles就話，人工智能除咗應用於飛行之外，家電方面亦係大趨勢，不過發明同普及係兩回事，現時普及嘅科技產品，好多都係幾十年前已經發明咗。
咪話人工智能，唔少人冇咗部智能手機，生活都已經有好大問題。張敬山就話，佢成日搞唔掂啲電腦，要靠科技部同事幫手，試過公司電腦出問題，成個人企喺度冇晒符。佢擔心，將來唔知係人類主宰科技，定係科技主宰人類，仲話擔心會為人類帶來威脅喎。
莊氏姊妹：難取代創意工作
同場仲有中華總商會常務會董楊華勇及太太莊菲娜與其妹莊莎娜。楊華勇認為，人工智能超越人類好合理，仲話科技係用嚟幫人類解決問題。經營珠寶生意嘅莊氏姊妹就認為，人工智能難以取代珠寶設計等有創意嘅工作，好似鑑定鑽石顏色、淨度等標準，都仍然係靠人判斷嘅。
卓妮