佔領行動期間領導學界嘅香港專上學生聯會（學聯）上周六開始一連三日舉行一年一度嘅會員大會，會議一開始就出師不利，本土派與溝通派「左膠」兩位秘書長候選人因為不滿會章「上莊選下莊」嘅規定而宣布退選，要求會員大會先修章，再重啟遴選程序。不過，兩派在會上就修章問題各持己見，最後投票人數不足，搞到流會收場兼要擇日再開會。由於修章不成就不可以重選秘書長，所以秘書長之位將無限期懸空。
據聞其中一個修章爭議係有本土派覺得要將修章權力下放落代表會，而溝通派就覺得要維持會員大會權力，以免學聯一個唔覺意被代表會解散。不過，本土派似乎喺呢個議題上得到不少支持，溝通派或者要搵多人去投票先可以改變劣勢。不過，就算按程序順利在三日內完成修章，都需要一個月時間重啟遴選程序，換言之學聯秘書處最少出現一個月真空期，而呢段時間會由代表會暫時支撐。
學聯預計本周六會再次開會，如果修章一事仍然膠着，照道理就不可以重啟遴選程序，到時秘書長之位就會繼續懸空喇。話時話，學聯去年因為退聯事件，成員院校已經由八間變四間，新一波退聯潮未到，又出現修章及缺莊問題困擾，都算係內憂外患樣樣齊喇，到底今屆學聯能否喺混亂之中重整旗鼓呢？