中環出更：馬紹祥自爆係電子廢物大戶
智慧城市聯盟早前舉行成立典禮，雲集本港多名創科業界人士。智慧城市離唔開數碼及智能電話，所屬政策局負責東九龍智慧城市計劃嘅發展局副局長馬紹祥自爆，佢屋企有四個人，但有六部電腦、三部平板電腦、八至九部智能電話，通常都係仔女愛用最高科技產品，用舊咗就會交畀佢同太太，所以佢笑笑口話，如果未來電子廢物徵費時，佢應該屬於大戶，要畀好多錢喎。
邱達根盛讚內地手機品牌
數碼網絡已經成為唔少人生活嘅一部分，唔少人出外旅遊都一定會安排好數據漫遊，以便隨時放相上社交網站。出席典禮嘅香港資訊科技聯會會長邱達根（Duncan），大讚一啲內地手機品牌善用大數據，當收到不明來電，手機就會顯示有關電話號碼嘅數據，包括有幾多個人拒絕聽，有幾多個人曾經接聽，令使用者可以考慮係咪接聽電話喇。
Duncan又話，呢類內地手機品牌會同全世界嘅電訊商簽訂互換協議，喺你去到任何國家時，手機就會幫你搵最平嘅數據上網計劃，通常每日只係二十至三十元，但香港仍然有電訊商收幾千元漫遊數據，如果再唔改，兩三年後就「拜拜」。一向有做晶片生意嘅中華總商會會董張俊勇都話，佢都試過要支付幾千元漫遊數據費，但現時好多電訊商都提供每日最高收費計劃。
講番智慧城市聯盟成立，聯盟召集人楊全盛話，希望透過聯盟作為平台，令香港不同持份者參與國家及國際嘅標準制訂。卓妮同場仲見到互聯網專業協會前會長洪為民，為咗適應數碼化年代，佢打算暑假帶囝囝去學編碼，話依家學校教得太差喎。
卓妮