中港矛盾日益尖銳，一講起兩地交流合作，唔少人即刻起晒弶，不過凡事總有例外，好似話合作打擊人蛇來港咁吖，相信係人都會舉腳贊成！
粵港兩地執法機關日前採取聯合行動，打擊跨境人蛇活動，成功瓦解一個活躍於中港兩地嘅偷渡人蛇集團，除咗拘捕大批骨幹成員以及非華裔人蛇，仲起出包括懷疑清洗黑錢嘅銀行匯款紀錄、銀行卡以及偷運人蛇嘅舢舨等作案工具。據本港警方介紹，人蛇集團通常先喺人蛇原居地物色人選，再安排佢哋以合法途徑坐飛機到中國境內，然後輾轉由深圳經陸路或海路來港。
話時話，假難民借內地做跳板嚟香港搵食，早就係公開嘅秘密，傳媒亦曾多番踢爆。最得人驚嘅係，唔少假難民喺祖家或逗留內地期間，案底已經厚過電話簿，有人批評內地當局對呢啲積犯來港隻眼開隻眼閉，等於將香港當作「馬桶」，幫內地排毒，真係一啲都冇誇張，兩地政府到依家至肯做嘢，都可算後知後覺咯。
即係咁，遲到好過冇到，最緊要係兩地情報交流同執法行動持之以恒，咪做騷敷衍民意就算數。當然喇，要徹底解決假難民問題，淨係靠打擊人蛇集團都仲係唔夠，事關人蛇來港嘅誘因一日存在，一日都會有人前仆後繼。好簡單啫，殺頭生意有人做，蝕本生意冇人做，人蛇偷渡來港閒閒哋要畀幾萬銀，如果香港唔係遍地黃金，邊個肯落疊呀？大家有眼見，假難民喺香港白食白住有納稅人供養不特止，得閒仲可以做黑工搵真銀，再唔係打家劫舍偷呃拐騙，甚至拍住黑幫食大茶飯都仲得，就算唔好彩被捕，亦可以狀告政府，只要博得法官同情，話唔定可以淨袋幾十萬衣錦還鄉，計落點都有so。
一句到尾，港府中門大開，引狼入室，加上酷刑聲請機制被濫用，淪為人蛇嘅護身符，只要舉手聲請免遣返，行街紙在手就可以賴死唔走，求其作個避債之類嘅藉口，又或者十年生九胎，拖個十年八載完全唔成問題。所以話，乜都係假，惟有退出聯合國《禁止酷刑公約》至可以根除後患，即使暫時做唔到，港府最低限度都應該向中央爭取要求聯合國增設保留條款，令公約有關收容酷刑聲請人士嘅條文不再適用於香港，又或者效法歐洲當局做法，一發現聲請者違法即時遣送回國。
始終都係嗰句，對假難民仁慈，等於對市民殘忍。收緊難民政策已經係國際大趨勢，強如歐洲，都畀難民問題搞到狼狽不堪，香港只係彈丸之地，憑乜嘢效婦人之仁吖！