教育局局長吳得掂出席一間中學的校慶典禮，準備離開時遭到數百示威者包圍，示威者要求佢下車親自接收信件！老朽相信賞慣日本紅葉嘅吳得掂，個心肯定唔單止離一離，甚至乎個心已跳了出來，只見佢低頭玩手機，眼都唔敢抬一下，及後要警方開道才可逃脫現場！
冇錯，來者不善，係「超越正常的表達方式」，是以「考慮到當時情況及顧及所有人安全，他才未有下車接信」；偉大得佢啊！虧佢仲話每月閒閒地讀三十本書，然而，佢哪有一點讀書人的變通及志氣？
先講「變通」，話說已故小說家張賢亮交遊廣闊，常給人題字，一次他本想寫王維兩句詩：「大漠孤煙直，長河落日圓」，寫完「大漠孤煙」四字，第五個字「直」，先寫了一橫，接下來應該是一小豎，誰知他一不留神，寫成了長長的一豎，眼看這幅字就要砸了。張賢亮及時發現失誤，他略一沉吟，索性將錯就錯，把第五個字寫作「甘」，後面加上「寂寞」二字，這一句成了「大漠孤煙甘寂寞」，下一句變成「長河落日自輝煌」；書讀得多讀得通，就懂得「變」。
至於志氣，不必陳義過高，說甚麼「莫道書生空議論，頭顱擲處血斑斑」，吳得掂係問責高官中嘅讀書種子，之不過，佢冇蘇軾嘅「菊殘猶有傲霜枝」，更沒有王國維嘅「一事能狂便少年」，也沒有「自反而不縮，雖褐寬博，吾不惴焉」的正氣，當然更不會有「士不可以不弘毅，任重而道遠」的胸襟，佢有嘅——只係龜縮功，上午龜縮都算嘞，佢下午出席另一個教育活動致詞時，一時話「深深不忿」，一時話佢係「好唔順氣！」作為問責局長，國教推唔到，母語教學、通識教育失敗、ＴＳＡ一鑊泡……阿哥，如今你一事無成變怨婦，好唔順氣嘅理應係納稅市民，高薪厚酬請咗個廢柴掌教育！怨婦下台吧！