政情：吳秋北請小肥張食檸檬
勞工界與商界一直喺標準工時立法嘅立場南轅北轍，早前一班勞方委員更齊齊拉隊離開標準工時委員會，雖然勞工及福利局局長張建宗（小肥張）落足嘴頭力邀勞方委員回歸，但都係不得要領。小肥張尋日趁出席工聯會立法會議員王國興嘅小西灣議員辦事處開幕禮，同坐隔籬嘅勞方委員、工聯會理事長吳秋北密斟，可惜吳秋北最後都係請小肥張食大檸檬。
卓妮現場所見，小肥張主動同吳秋北傾偈，其間仲輕拍吳秋北手臂，扮晒老友，但最後都係游說唔到吳秋北改變初衷。吳秋北事後話，小肥張立場一貫，所以勞方會繼續杯葛標時委員會第二輪諮詢，仲會另起爐灶，廣邀勞工界出席四月中舉行嘅大會表達訴求。
王國興「日以繼夜」播金句
講返王國興新議員辦事處，主要因為佢當選東區區議員而開設，但就比前任黨友陳靄群辦公地方仲要細咗。點解？原來佢間咗一半地方借畀街坊開會、搞工作坊及自修室，又喺辦事處外加設電子板及電視螢幕，日日loop住佢「日以繼夜、夜以繼日」嘅金句及立法會開會情況，睇怕居民想唔記得佢啲金句都好難喇。