前年佔領行動及上月立法會新界東補選之後，社會上醞釀一股新舊交替嘅呼聲，不同政黨都有立法會元老宣布唔再競逐連任。不過，並非個個政黨都可以順利交接，好似民協就仍然畀班老鬼把持，搞到一班中生代要靜靜起革命。
民協中委會早前就甄選九月立法會選舉參選人，傳聞會上有人投票時唔聽一眾元老意見，執意要搵較年輕嘅新任黨主席莫嘉嫻代替深水埗區議員譚國僑參選立法會九龍西。
據聞因為一班中生代搞革命，執意莫嘉嫻參選九龍西，搞到黨內向傳媒公布參選意向時，出現九龍西參選人鬧雙胞嘅局面。知情人士透露，莫嘉嫻深得黨內支持，特別同一齊搞「月經假期」嘅黨友非常投契，就算今次加入民調及論壇計分，相信今次革命仍好大機會成功，似乎譚國僑嘅政治生涯氣數已盡。話口未完，有人發現莫嘉嫻與部分民協區議員「孖公仔」出現喺橫額之上，似乎係為出選九龍西鋪路。
其實，當社會要擺脫老人政治形象嘅時候，譚國僑一而再參選似乎真係講唔過去，再者譚國僑喺民協三十幾年，主席又做過，立法會又選過，際遇都算係唔錯喇，會唔會係時候退位讓賢畀後生發揮，等民協有更大發展呢？