政情：蔡冠深自嘲理科「文盲」
中華總商會永遠名譽會長蔡冠深（Jonathan）一向支持科研，去年底先至捐助一千萬元支持港科院成立，日前又穿針引線同英國科學博物館合作，喺香港科學館舉行「世紀實驗：探索神秘的粒子世界」展覽。
落力撐叻人搞科研
Jonathan形容今次嘅展品屬於世界級，目的係啟發本港青年對科研嘅興趣，鼓勵港青勇於尋夢。講到尋夢，唔知佢細個有冇發過探索宇宙奧秘嘅夢呢？點知Jonathan笑稱自己係理科「文盲」。
Jonathan話，佢係讀文史哲嘅材料，鍾意人文及感性事物多啲，讀書時搞唔掂理科。佢笑笑口話，自己唔夠叻，所以要支持叻人去搞科研咁話。適逢今年係香港中華科學與社會協進會廿周年，身兼主席嘅Jonathan準備舉行一系列活動，今次展覽就係其中之一。佢話，香港唔係冇人才，只係基礎唔夠好，所以結合內地走向世界係未來可行嘅方向。