政情：愛車名人 雲集馬場

出席活動嘉賓眾多，包括愛沙尼亞共和國駐港名譽領事林建康及太太林黃寧艷、霍麗萍與丈夫John、律師會前會長王桂壎與太太Angela等。講起做馬主，史佩加話最初只係爸爸加埋佢個名落去，一家人齊撐愛駒，而佢都係近年先做車主，考咗車牌後都係揸緊部老爺車喎！卓能集團非執董趙式浩就話自己平日最常駕駛嘅係日本車，因為佢哋做工程不時要落地盤，所以最緊要實用，唔驚刮花同整污糟。

林黃寧艷當年喺英國讀書一夠年齡已經考咗車牌，事關佢全家人都覺得駕駛係好基本嘅技能，一定要學識，但依家有兩個小朋友之後就好少再自己揸車喇。

劉家輝嘆難提升業績

至於寶馬香港區董事總經理劉家輝，就笑笑口話自己做車主就可以，但做馬主就要儲多啲錢同學習多啲有關知識先得，仲話市道低迷，好難提升業績，反而係要保持良好服務質素，唔畀客人流失之餘，要令佢哋更加印象深刻。

霍麗萍（右）熱愛攝影，左為丈夫John。 （葉華英攝）

劉家輝（右）同葉錫安傾得咁肉緊，莫非講到市道低迷？

除咗駕車觀賞香港景色外，霍麗萍就選擇拍攝欣賞香港，佢話早幾年除咗有影低家族大宅面貌，仲有拍攝本港各區風景，但佢慨嘆依家好多地方已經唔同晒喇。