政情：學民摺埋 被促回水

學民宣布解散，過百萬嘅資產何去何從，相信要向公眾交代清楚。黃之鋒指學民一百四十五萬元資產會分成兩份，其中七十萬元會用作成立新學生組織嘅創會及運作經費，而另外七十五萬元就會撥入新成立嘅「學民思潮法律援助基金」，以支援日後所有學民成員之前參與行動後所面臨官司、審訊及檢控所需嘅律師費用。所以由黃之鋒與學民前成員成立嘅新政黨將唔會接收學民一分一毫。

其中25萬資金去向成疑

不過，以上講法就同網上流傳一段黃之鋒於三月十四日喺社交網站，提及學民解散之後嘅財政安排留言有所出入。嗰段留言題為「學民思潮最後一次成員會議」，建議將學民一百二十萬元資金撥入新政黨作為創黨經費，而新政黨會承擔學生因參與行動而涉及嘅律師費，而另外五十萬元就會撥入新學生組織做創會經費，並於三月六日會議上獲通過。值得留意嘅係，網上原方案總金額係一百七十萬元，而尋日公布嘅方案總金額只係一百四十五萬元，短短兩星期之間就少咗二十五萬元資金，呢筆錢去向確係一個謎。

黃之鋒接受查詢時承認，會上曾討論有關撥款予新政黨嘅方案，評估不同因素，考慮公眾對捐款期望之後，決定新政黨不收取學民一分一毫。問到點解會咁樣重新分配資產，學民發言人黃子悅解釋，新學生組織頭幾年嘅籌款能力或較低，所以將其中七十萬元分撥予新學生組織作初期運作嘅經費。不過，學民「分身家」惹來網民熱議，指當初支持者係捐款畀學民，質疑點解新學生組織可以收取學民嘅資金，有人更提議成立「學民苦主大聯盟」追討捐款。

獲「鋒」太上皇垂簾聽政

對於點解唔保留學民、又一定要成立新學生組織，有說法話：如果學民唔解散，又點樣「分身家」？學民撥款予新學生組織後，將來黃之鋒打骰新政黨之餘，亦成為新學生組織嘅「太上皇」，「垂簾聽政」。不過，將成為新學生組織負責人嘅黃子悅就解釋，過去學民高度政治化，令佢哋好難喺校園推動公民教育，希望成立新組織集中教育議題有助改善問題。呢個解釋係咪令人信服，就等大家自行判斷喇！