熱烈地彈琴熱烈地唱，歌聲多奔放，個個喜氣洋洋！阿哥，乜事咁高興呢？
嘻！人稱「每周一鑊」嘅前食衞局局長終被叮走喇，佢早已因渾渾噩噩而有「廢鑊」之稱，其任內醫療事故無日無之，食物安全常常失守，總之，佢做嘢本着「側側膊，唔多覺」；政府換屆後，以為佢會從此消失，明明係負資產，冇得玩，點知今屆政府有眼無珠，又從一堆發臭嘅垃圾堆搵番呢粒「廢電池」，翻閹佢做平機會主席，任由佢尸位素餐；政府如此用人，當真應了屁眼裏拔火罐——沒病找病！
事實上，廢鑊若然安安分分的尸位素餐，那也罷了！可他偏要無風起浪，添煩添亂！任內不但正經事沒做好一件，還建議就「族內歧視」、「保障事實婚姻」立法等等，令本已高度分化嘅社會進一步撕裂！
當知道醜聞不絕嘅廢鑊被叮走，難怪多個團體敲鑼打鼓表示歡迎！鬼咩，一個只知私下擴權、肥上瘦下、打壓異己及偏袒性小眾團體嘅廢鑊，竟然坐上「平機會」主席呢個位，認真係上帝開嘅最大玩笑！本屆政府管治無能，管治班子拉雜成軍，有辦你睇，像周一鑊這等庸才，依然被翻閹委以重任，見微知著，「雞鳴狗盜之出其門，此士之所以不至也」；加上政府用人唯親而非用人唯能，香港呢個「福地」，又怎不亂成一鑊泡！
古人說：「居其位，無其言，君子恥之；有其言，無其行，君子恥之」。意思主要是說處於一定職位就應該有符合那個職位的言行。放眼特區政府的管治班子，「居其位無其言」的何其多，即使有其言亦多言不及義，亂噏廿四；譬如「官到無求膽自大」之妄言。
用甚麼人當官，確是個問題！