政情：林卓廷 許智峯 出選存暗湧
民主黨（白鴿黨）早前已公布有意參選九月立法會選舉嘅人選，九龍東及九龍西似乎鐵定由現任議員胡志偉及黃碧雲分別競逐連任，至於新界西就係副主席尹兆堅及元朗區議員兼小說家鄺俊宇之爭。至於港島及新界東，雖然唔少人都認為中西區區議員許智峯及總幹事林卓廷（阿廷）跑出機會較高，不過實情係有暗湧，事關選足四屆區議會都落敗嘅「黑仔王」莊榮輝及「變性人」梁詠恩（Joanne）都落力拉票，許智峯及阿廷係咪可以坐定粒六，仲係未知之數。
莊榮輝：鬥激唔輸蝕
白鴿黨現任議員單仲偕（「先刂」雞）及劉慧卿（Emily）都決定退下火線，因此騰出港島及新界東議席。港島情況原本多人爭上位，不過到咗黨內提名最後階段，「南區三子」區議員柴文瀚、羅健熙及區諾軒都冇報名。原本以玩激進抗爭出位嘅許智峯可以自動出線，惟莊榮輝最後階段決定參選，令該區選情平添變數。
莊榮輝直言，出選目的係唔想港島選區冇競爭，仲細數自己有三大優勢，首先係親和力大，其次係佢喺區內主打反圍標，已親身接觸過港島一百座私樓約一萬名業主；最後係講到要激，其實佢都可以好激，似乎想話唔係許智峯先識激。雖然佢喺區選屢戰屢敗，但佢自嘲因禍得福，因為外界會因此記得佢呢名「黑仔」。佢仲透露，如果佢成功出線，「先刂」雞有機會排喺名單第二位，所以佢入局機會唔細喎！
梁詠恩：靠平權吸票
至於新東競爭者就有Joanne，佢去年先加入白鴿黨。Joanne話，佢參加聯合國會議認識Emily，其後獲邀入黨。Joanne自稱可以吸引關注同志平權嘅票，估計呢類人士唔少，如果佢哋全部投票畀佢，肯定夠當選有餘。至於同區有人民力量陳志全（慢必），Joanne就認為慢必參選時唔係主打平權，佢當選後先至公布性取向，所以佢仍然睇好自己若主打同志議題，吸票能力將大過慢必。不過佢承認，現時最大困難係要得到黨員認同才能出線，所以佢已積極喺選區掛橫額拉票，並游說支部支持。
白鴿黨將於下月中旬及下旬分別舉行支部及黨大會，屆時將決定出選名單。