中環出更：蔣麗芸暗罵慢必「八婆」
立法會財務委員會尋日召開四節、共八小時會議，受部分泛民議員拉布影響，會議進度緩慢，單係審議基本工程儲備基金撥款就用咗逾八小時。社民連梁國雄（長毛）喺第二節會議時動議休會，民建聯蔣麗芸（Ann）發言批評時，被人民力量陳志全（慢必）打斷，阿Ann冇好氣咁爆出一句「八婆」。雖然冇指名道姓，但暗罵對象呼之欲出，莫非阿Ann已當鍾意男人嘅慢必係女人？
發言被插嘴
事件起因係長毛同人民力量陳偉業（大舊）先後喺會上提出有關栢麗大道榕樹嘅問題，被主席陳健波指其重複提問，長毛不滿並動議休會。阿Ann發言時話，栢麗大道嘅榕樹已有圍欄保護，批評「九龍西啲嘢關大舊咩事」。此時慢必插嘴，指陳健波只畀兩分鐘議員發言，八十幾頁嘅問題當然唔夠時間問。
慢必此舉可能觸怒咗阿Ann，令佢衝口而出一句「八婆」，泛民議員隨即要求佢收番言論，仲話此言係侮辱女性，連阿Ann黨友陳克勤都在旁勸解。但阿Ann唔肯認錯，仲叫自認係八婆嘅人企起身喎！
卓妮