中環出更：港大何東堂校友 細訴情「竇」初開時
創校百年嘅香港大學舍堂文化濃厚，其中作為港大唯一女生宿舍嘅何東夫人紀念堂，尋日舉行舍堂六十五周年開幕典禮，廣邀香港建築師學會首位女會長鄺心怡（Anna）、九龍醫院前行政總監蔡炫中、有「煙花王后」之稱嘅恒信公關創辦人梁安妮（Annie Bentley）等著名舊生分享當年點滴。最有韻味嘅係何東堂毗鄰男生宿舍利瑪竇堂，因而締造多段良緣，唔少何東人都係喺舍堂搵到初戀甚至結婚對象添！
調戲男生 嗌買雪糕數金魚
Anna同蔡炫中曾經一齊住何東堂，做過「樓姊妹」，憶當年就不得不提點樣玩男生。佢哋經常要求利瑪竇堂男生跑到西營盤水街買雪糕，仲要跑得夠快以免雪糕溶化，又會要求男生到舍堂樓下數金魚，考驗佢哋入女生宿舍嘅膽量。要數最重要嘅傳統，一定係利瑪竇男生到何東堂搶銅鑼，何東人再從宿舍掟水袋反抗，呢個傳統叫「搶Gong」，一直保留至今。
Annie都話，何東堂生活造就佢識到住喺利瑪竇堂嘅初戀情人。著名導演張婉婷係佢當年嘅樓姊妹，Annie自言當年有份說服張婉婷重返何東堂拍《玻璃之城》，電影記錄咗何東堂同利瑪竇堂校友嘅愛情故事，係何東人必睇嘅電影。
近年唔少新建宿舍都已係男女同宿，港大行政及財務副校長康諾恩（Steven Cannon）認為，何東堂歷史悠久，應該保留傳統，仲笑言至今都未有機會踏入何東堂喎！
卓妮