潮流興講multitasking，加上香港人出名轉數快，一個人負責幾個崗位係職場常態。之不過凡事都有例外，如果涉及人命安全，就真係唔可以亂嚟嘞！
話說近排流感高峰期，求診病人逼爆公立醫院急症室，部分醫院病床使用率高達百分之一百三十，有病人甚至試過苦等三日都未上到病房。面對嚴峻形勢，食物及衞生局局長高永文推出五招救亡，其中安排護士為病情穩定嘅病人配藥，以紓緩人手不足嘅建議最為惹火，有前線護士喺網上留言「我們憤怒了，請不要再消耗我們對護理僅存的熱誠」，可謂道出唔少人嘅心聲。
講真，今次連白衣天使都有火，一啲都唔出奇。食衞局其他四招，包括順延部分非緊急住院服務同手術騰出病床、復康醫院加開病床，以及為前線醫護提供額外加班津貼等，你頂多都係話佢拆東牆補西牆，姿勢大過實際，但要求護士撈埋醫生或藥劑師嗰份就唔同講法嘞。正如來自醫學界嘅立法會議員話齋，過往只限於資深護士根據醫生處方再微調藥物分量，從未試過由護士直接配藥；加上現時無相關法例保障護士，萬一過程中病人病情惡化甚至失救死亡，護士隨時要上身，批評有關安排對佢哋極不公平。
冇錯嘞，開講都有話，「術業有專攻」，護士同醫生或藥劑師等專業訓練唔同，絕對唔可以亂咁「補位」。家陣人命關天，是是但但，求求其其，將病人當作白老鼠，同搵人命較飛有乜分別吖？醫療事故點可能唔增加吖？
你知喇，公營醫療系統問題多多，亂象叢生，前線做到好似隻狗咁，怨氣多多，照計高局長應該攝高枕頭諗吓點樣拆掂佢，可惜事實啱啱相反，佢老哥日前巡視公立醫院急症室後，一口否認流感防控同削減醫管局資源有關，又話部分人員可能因為誤解而有怨氣，簡直火上加油，原本諗住賣口乖，結果變咗犯眾憎，你話係咪唔衰攞嚟衰吖。
事實勝於雄辯，港府投放幾多資源落公共醫療度，大家有眼見。冇錯，下一財政年度醫管局經常性撥款高達五百億元，比五年前增加超過三成，但實際上港府舊年實行節約方案，醫管局要削減百分之零點五經常性撥款，按年經常性開支更加不增反減，再加上近年醫療需求不斷上升，此消彼長下，服務唔差、士氣唔低至奇喇。
計功夫茶話齋，與其要求護士配藥，不如叫佢哋兼埋局長份工。反正港產官僚都係胡混度日，碌碌無為，幫納稅人慳番筆都好吖！