網上經常都有二次創作，但被人批評無尊重原創者版權。財政司司長曾俊華（鬍鬚曾）尋日出席一個電視業活動，被問及會贈送一首咩歌畀創意工業，鬍鬚曾就回應話會送歌星徐小鳳（小鳳姐）嘅《喜氣洋洋》，話因為呢首歌已被二次創作七、八次喎。不過，網民改編《喜氣洋洋》，好多時都冇問過小鳳姐或取得歌曲版權人嘅同意，鬍鬚曾送呢首歌畀創意工業，會否是對業界一種諷刺呢？
鬍鬚曾在財政預算案中引用台灣歌手蘇芮歌曲《憑着愛》，但當日記者會上，有記者就將芮（讀音「銳」）讀成丙，佢話其實當時反應「想笑囉」，但事實上當時又留意唔到佢想笑喎，難怪活動主持都話佢掩飾得幾好。
鬍鬚曾又話，其實今年預算案好有創意，只係市民唔為意。其實由頭睇到尾，再由尾睇番上頭，都睇唔出邊忽有創意，估唔到鬍鬚曾連創意都掩飾得咁好！