中環出更：「玲」願相睇 締結良緣
仁濟醫院早前舉行周年慈善餐舞會，為各項服務基金籌募經費，數百名城中政商名人聚首一堂。今年仁濟董事局喜事連連，繼總理羅穎怡於年初出嫁之後，四月底輪到紀惠集團行政總裁湯文亮女兒、總理湯振玲（Jacqueline）與男友Charles擺酒結婚。喜上眉梢嘅Jacqueline自爆，同Charles係長輩安排相睇認識，結果搵到一段好姻緣，所以勸喻城中恨嫁姊妹唔好抗拒相睇喎！
今次係Jacqueline第一次相睇，由於係長輩介紹所以令佢好放心赴約。唔知相睇時有冇發生甩轆趣事？Jacqueline就笑笑口話，當時連埋雙方長輩共有六人，兩位當事人忙住同對方長輩傾偈，反而冇乜交流，仲因為座位安排問題而睇唔到對方，後來約出來飲咖啡先至擦出愛的火花。
伍步功釣魚享受人生
當晚舞會，仁濟主席林煒珊、副主席兼餐舞會籌委會主席鄭承峰等董事局成員齊出動招呼賓客。永隆銀行後人兼順德聯誼總會副主席伍步功、前南區區議員廖漢輝都有到場支持同為順德人嘅總理陳李詠詩。
伍步功依家逐漸卸晒公職享受退休生活，閒時最鍾意打波及釣魚，經常到西貢海釣，有時獨自一人由朝早六時釣到天黑都唔覺悶，仲話期間乜都唔諗，好舒服。釣魚幾十年，最威水一次係喺墨西哥灣釣到一條重達二百一十磅嘅劍魚。以為伍步功咁鍾意釣魚，實好鍾意食魚，咁就錯喇，佢自言食魚好揀擇，釣到嘅魚獲多數送畀朋友食喎。
卓妮