當今世界疫情不斷，一時伊波拉，一時寨卡，搞到人心惶惶。尤其孕婦更加惴惴不安，萬一不幸感染寨卡病毒，隨時導致胎兒患小頭症，唔驚就假。
係人都知，病毒無國界，寨卡疫情來勢洶洶，香港自然唔可以獨善其身。港府繼早前將寨卡病毒列為法定須呈報嘅傳染病，尋日更宣布啟動應變計劃，根據寨卡病毒嘅風險分為戒備、嚴重及緊急三個級別，隨時因應疫情進展而採取唔同措施咁話。
正所謂，防疫寧緊不能鬆，港府知道寨卡病毒非同小可，依家至採取應變措施，雖然慢咗幾拍，但遲到總好過冇到，最緊要係嚴格把關，唔好又甩甩漏漏，否則，有措施等於冇措施，到頭嚟又係嘥氣嘅咋。
唔係危言聳聽（口架），香港過去已有唔少慘痛教訓，好似沙士、禽流感、豬流感等等，次次都係因為港府後知後覺，搞到雞毛鴨血。今次話就話已啟動應變計劃，但究竟可唔可以將寨卡拒於門外，仲要睇過至知。
尤其香港目前正面對流感高峰期，病人逼爆醫院，而寨卡病毒又虎視眈眈，簡直係雪上加霜。唔係誇張（口架），流感肆虐搞到公立醫院幾乎癱瘓咁滯，除咗逼爆急症窒，內科病房病床使用率亦遠超負荷，有啲醫院病床使用率達到百分之一百二十五，前線醫護人員固然疲於奔命，而病人仲慘，急症室閒閒地等十幾粒鐘，甚至有病人等咗三日都未上到病房，問你怕未。淨係過去一周咋，就有二十四人死於流感；而由今年一月底實施監察至今，嚴重個案已達二百宗，其中七十幾人死亡，都咪話唔大鑊。
即係咁，最近天氣變幻莫測，乍暖還寒，流感肆虐一啲都唔出奇，但當局將所有亂象都歸咎於流感，咁就未必係事實喇。正如有傳染病專家質疑，流感高峰期年年都有，結果年年都搞到倒瀉籮蟹，究竟係乜原因？答案好簡單，咪就係因為醫管局管理混亂，前線人手不足，七個蓋冚十個煲，想唔爆煲都幾難。
係呢，公立醫院被流感搞到七國咁亂，醫管局究竟點樣補鑊？係咁嘅，當局日前推出三招所謂應變措施，包括騰出康復醫院床位收急症病人、增加津貼吸引休班員工幫手、專科服務增加護士直接配藥服務喎，可惜又係頭痛醫頭，腳痛醫腳，根本解決唔到問題。
講到底，公共醫療系統千瘡百孔，當局一直唔肯動大手術，問題至會不斷惡化。家陣一場流感已經倒瀉籮蟹，萬一寨卡病毒殺到，雙重夾擊，你話點算呢？唔怕一萬，最怕萬一，大家最好自求多福，唔好旨意港產官僚把關吖！