政情：區議員困身 愛神難降「琳」
以往好多從政者的年紀都有番咁上下，早已成家立室，但以為政界中人交遊廣闊就唔使怕愛情無着落就錯喇！好似荃灣區議員林琳因為衣着同身材出眾，一直成為網民議論對象，早前更爆出有男網友瘋狂向佢傳送性器官自拍照性騷擾，但林琳話出任區議員至今六年，愛情生活就dry（枯燥）足咁多年，仲歸咎區議員身份令男士不敢埋身添。
今年三十四歲的林琳話，區議員工作困身，加上算是半個公眾人物，過去與不少男士初相識就算幾投契，一到交換卡片時，對方都會對其身份顯得退縮，之後不了了之。她又稱，近年潮興speed dating（約會配對）找對象，但礙於自己是區議員而不敢出席，而且有感性格比較直接和硬朗，並非個個男仔都鍾意這類型，所以多年來一直單身。
其實林琳早年到澳洲留學多年，加上是緬甸華僑後代，大可以嘗試找外籍對象，甚至看看自己黨友有冇「筍盤」介紹，就唔使怕識錯朋友被人性騷擾喇。