中環出更：經濟不景 潮興換領
上海總會（總會）早前在自家會所餐廳舉行春茗，好多江浙及上海籍名人出席。經濟不景，唔同行業有唔同遭遇，度身訂造男裝品牌詩閣（Ascot Chang）第二代傳人張宗琪（Tony）都分享咗一個特別現象，就係多咗舊客拎恤衫到其店舖換衣領。Tony解釋，因為男士襯衫多數係衣領角位破損，所以客人索性只係換衣領，仲可以順便轉埋顏色，咁就好似買咗新衫一樣喎！
上海幫一向對衣着好講究，紹興旅港同鄉會會長車弘健（Anthony）及保良局總理顧東華都唔例外。Anthony話，好欣賞詩閣恤衫仲用人手挑針，但佢就未幫襯過，遲啲要做番幾件支持吓喎。顧東華就鍾情台灣一個高檔時尚品牌，皆因佢太太係台灣人，梗要支持家鄉品牌啦！
車弘健講究 愛人手挑針
同場仲有總會永遠名譽會長李和聲、理事長王緒亮及中文大學前校長金耀基等人，大家樂集團主席陳裕光女婿趙益坤（Leonard）都喺度，席間同總會理事雷秉堅及太太Lynn傾得好開心。唔講唔知，Leonard嘅爺爺趙安中係老一輩寧波實業家兼慈善家，喺外國出世嘅Leonard近年加入總會做理事，希望延續家族同家鄉嘅聯繫。
上海總會係唔少名人嘅飯堂，王緒亮預告話，餐廳將進行為期三個月嘅大裝修，希望可以一邊裝修一邊營業，否則一班食客就好閉翳喇！
卓妮