周永新教授在一個退休保障論壇上，再次炮轟政府嘅退保諮詢欠缺誠意，由始至終只擔心財政上無法承擔，「企喺度乜嘢都唔做」；事實上，政府嘅所謂「諮詢」，一早預設立場，睇吓「百毒不侵」嘅政務司司長林鄭那副嘴臉就知啦，佢根本冇誠意去推全民退保，一味話社會福利「易放難收」，又強調自己「服務」政府三十多年來，從未見過政府如此多資源改善社福！
真係多謝晒咯！基層大眾及老人家睇怕都要感激流涕兼夾錢送個花籃畀林鄭，上書「功德無量」或「天堂有位，是你應得」！政府是否真「冇錢」推全民退保呢？本報「正論」屢次指出其謬論，一味靠嚇及不負責任，老朽亦毋須再贅言。講真，政府寧願將千億資金用於興建大白象工程，而不願考慮專家、學者的「全民老年金」，甚至一百多名學者聯署提出嘅「全民養老金」方案，如此一意孤行，仲夠膽死話「未見過政府如此多資源改善社福」！阿姐，香港自稱是社會制度完善嘅地區，但老人福利就處於世界落後水平；一個明明可行嘅全民退保都唔肯踏出正確第一步，這是甚麼「多資源改善社福」邏輯？
有這麼個不合邏輯嘅笑話：「文革前後中央人民廣播電台天天早晨開始歌頌毛澤東，稱『他是人民大救星』，晚上結束時又播《國際歌》，高唱『從來就沒有甚麼救世主』，兩支互相矛盾的歌一起播放十幾年，全國人民大多熟視無睹。」
做了三十多年高官嘅林鄭，睇怕亦是「自相矛盾」多了，凡事都可自我感覺良好，傲然一笑解千個社會迫在眉睫嘅問題！高官視全民退保為洪水猛獸，美其名為「子孫後代負責」，卻漠視眼前長者晚景生活淒涼，自己天堂有位，人哋死無骨灰之龕，呢個係乜嘢邏輯呢？請問。