中環出更：A貨橄欖 靠真．橄欖代出頭
親生兄弟有時個樣真係似到一睇就知！尋日屯門區議員何君堯位於屯門美樂花園嘅辦事處開幕，一個貌似立法會議員陳鑑林（橄欖）嘅身影突然出現，連語氣、聲線都好似橄欖，原來佢正係橄欖親生大哥陳鑑波，亦係香港潮汕客屬聯誼總會秘書長。陳鑑波都講笑，話自己係「Ａ貨橄欖」，仲試過路過屋邨時，有街坊同佢投訴垃圾問題。雖然兩兄弟好似樣，不過陳鑑波強調，佢係唔可以代橄欖落區嘅！
講起細佬，陳鑑波就話橄欖性格「理所當然」啲，自己做大佬就較順得人。雖然佢比橄欖大兩年，但原來細個時通常都係佢被人「蝦」，橄欖就成日代佢出頭。陳鑑波憶述，當年住喺木屋區，試過被壞分子「蝦」，橄欖知道後話「使乜驚佢哋呀！」之後就代佢出頭。估唔到平日滿臉笑容嘅橄欖年少時咁英勇。
何君堯辦事處接地氣
雖然何君堯同陳鑑波識咗好一段時間，但原來佢唔知對方係橄欖大哥，仲話講落先覺得有啲似樣。而尋日開幕禮，鄉議局副主席林偉強、「小巴大王」馬亞木同兒子馬僑生都有出席。何君堯話，辦事處月租七千五百蚊，前身係補習社，冇做太多裝修，覺得簡簡單單就得嘞。辦事處嘅優點就係喺地舖，夠晒接地氣喎。
何君堯太太亦都有嚟辦事處撐丈夫，原來兩人結咗婚近卅年，都仲係非常恩愛。何君堯話，揀呢個辦事處時太太都有畀意見，仲建議擺副對聯喺辦事處，等佢心平氣和啲。
另外，馬僑生就提起自己廿一歲時喺爸爸鼓勵下，考咗一次就考到小巴牌，私家車就反而考咗兩次。而佢自己幫手家族生意後都試過喺小巴站頭遇到壞分子，不過都唔使爸爸幫手，仲話有時同對方傾吓都解決到件事，睇嚟佢嘅談判技巧應該唔錯。
卓妮