潮流興保育，港府亦唔執輸，成日將保護歷史建築掛喺口邊。可惜吹水唔抹嘴，如果你真係相信港產官僚真心保育，咁就太傻太天真嘞。
嗱，又有歷史建築物告急嘞。擁有九十年歷史、列為二級歷史建築嘅梅窩「袁氏大屋」，由於日久失修，主樓嘅水泥不斷剝落，部分鋼筋折斷，倒塌咗大半，前年經歷黑雨同颱風後情況急速惡化，主樓開始腐蝕，頂層塌下，再唔盡快搶救，隨時危危乎。如果港府真心保育，又點會坐視不理呢？
袁氏大屋來頭唔小，呢座一九三○年興建嘅大宅，花崗岩物料可以抵擋槍炮攻擊，唔止被列為二級歷史建築，仲係本港極為罕見嘅城堡式建築添。可惜吖，古老大屋難敵歲月洗禮，業主缺乏資金維修，以前當局又闊佬懶理，卒之咪搞成咁囉。業主希望港府新成立嘅歷史建築保育基金撥款協助維修，可唔可如願以償，仲係未知之數。
大屋業主透露，十幾年前曾有高官有意購入大宅作酒窖用途，亦有發展商打算購地發展，但佢一心想保育大樓，保存歷史，所以一一拒絕。諗唔到人算不如天算，今日大屋依然難逃灰飛煙滅嘅危機。其實，本港有唔少類似袁氏大屋嘅舊建築，話就話被列為歷史建築，但唔係個個業主都有能力承擔巨額維修費用，日久失修之下，唔少變得蓉蓉爛爛，古樓淪為危樓。如果業主對保育冇興趣，歷史建築更加岌岌可危添。講到底，私人業權受到法律保障，就算建築物被列為歷史建築，亦唔代表就可以逃過被拆卸厄運，山頂何東花園同灣仔同德大押就係典型例子喇。
所以話，港府開口埋口保護歷史建築，得個講字咋。當局推出過唔少所謂嘅保育措施，例如活化歷史建築夥伴計劃、維修資助計劃，而且設立文物保護專員，今年施政報告仲推出五億元歷史建築保育基金添，名堂多多，係威係勢，可惜雷大雨小，作用有限。
講到尾，保育唔係趕潮流，更加唔係做騷，必須有全盤計劃，周詳部署，先至能夠取得顯著成效。點知港府啱啱相反，欠缺完善保育政策，次次都係臨渴掘井，見步行步，咁又點樣保護歷史建築吖？家陣港府推出保育基金，話就話好過冇，最怕又係姿勢多過實際嘅咋。
話時話，本港旅遊業走下坡，業界絞盡腦汁救亡，其實保育歷史建築不失為一個賣點。正如有人話齋，歷史建築就係一個地方嘅歷史活化石，尤其香港中西文化薈萃，唔少建築物極具特色，如果能夠發展「深度遊」，幾有吸引力，絕對好過搞乜嘢美食車喇。
無論點講都好，保育唔係淨係嗌口號，必須有實際行動。袁氏大屋日久失修，港產官僚固然要諗辦法補鑊，更重要係全面檢討政策，改善保育工作，否則，好多歷史建築只能成為集體回憶咋！