一個人口無遮攔，言多必失。國學大師黃侃說：「學問最高者，語言最簡。」佛家經典禪語：「大悲無淚，大悟無言，大笑無聲。」事實上，人活到一把年紀，應該深明人生好多嘢講多無謂，食多會滯，好似話「待我君臨天下，許你母儀天下」，實情係「待你君臨天下，怕是牢籠囚花」；或者「待我歸田卸甲，許你浪迹天涯」，真相係「應是紅顏早嫁」。
「夢熊大師」未判囚時曾接受爛果報訪問，大言炎炎話要爆「政治炸彈」，話音未落就因妨礙司法公正鋃鐺入獄；呢頭又狂言「我自橫刀向天笑，去留肝膽兩崑崙」，誰不知喺荔枝角收押所度過兩日鐵窗生涯，食咗兩隻雞翼都未消化，就報稱頭暈送院治療。夢熊大師如此氣短，試問如何「橫刀向天笑」？真的被老朽不幸而言中：弱雞成咁，只配「戇居向天笑」。
夢熊大師援引革命家譚嗣同無畏無懼、毅然赴死就義嘅詩「明志」，根本完全荒腔走板，貽笑大方。當年譚嗣同眼見封建專制君主逞其兇殘淫殺之威太久了，視國民為奴婢，是以他借法國大革命時代最勇毅的志士丹東的壯語大聲疾呼：「誓殺盡天下君主，使流血滿地球，以洩萬民之恨！」反觀夢熊大師「造王」不成，求官不遂，竟因怒成恨，牢騷太盛擲出一封證據確鑿嘅電郵，搞到自己淪為階下囚。
佢又喺犯人欄大呼大叫「歷史將宣判我無罪」，更係九唔搭八。呢句嘢係古巴革命領袖卡斯特羅在一九五三年攻打蒙卡達兵營行動失敗後，於受審法庭上所說的著名辯護詞，表達了他將為古巴的自由而獻身的不滅信念。而夢熊大師活脫脫官迷心竅，「押錯注一鋪清袋」，卻胡言亂語。老朽希望佢氣短之餘，在單獨囚禁面壁思過時，能悟出修身最關鍵在於慎獨，而非口無遮攔也！