本土民主前線發言人梁天琦喺立法會新界東補選中獲得六萬幾票，佢認為選舉結果證明香港政治已經「三分天下」，分別係建制派、泛民主派及本土派。繼民主黨反對呢個講法後，社民連立法會議員梁國雄（長毛）尋日亦話未見到所謂「三分天下」嘅情況，但就承認梁天琦有部分選票係來自社民連嘅票倉，即係長毛嘅部分支持者投咗畀梁天琦。近年社民連都被新一代嫌「唔夠激」，今次選舉仲要被本土派搶走票源，睇嚟九月大選長毛嘅選票都好大機會一去無回頭，唔知長毛有咩對策呢？
