政情：中出羊子參選「食也難吞」
去年曾參與區議會選舉嘅港獨人士、有外號「昭明公主」嘅中出羊子（原名鍾銘麟），尋日凌晨表明有意參與九月立法會選舉新界東或九龍西選區，若出戰新界東，將與被稱為「國師」嘅本土派學者陳雲等人隨時攬炒。中出羊子亦就選舉一事去觀音廟求籤指點迷津，結果求得一支中籤。籤文上嘅古人為「曹操話梅止渴」，唔通係指中出羊子嘅政途未如理想，勸佢放棄參與立法會選舉？
觀音廟求籤「話梅止渴」
該籤文為觀音籤第十七籤，係一支中籤「曹操話梅止渴」，籤文為「莫聽閒言說是非 晨昏只好念阿彌 若將狂語為真實 畫餅如何止得飢」。大意係話曹操率軍，士兵汗流浹背，口乾舌燥，但搵唔到一滴水。曹操於是話前面係一大片梅林，到時就可以食梅解渴，士兵聽到充滿期待，就唔覺口渴。未知籤文係咪點化中出羊子，諗吓當選咗呢？
另外籤文亦有附上解說：「心中不定 枉看經文 恰似畫餅 食也難吞」。可能指中出羊子嘅性情不定，會受流言蜚語影響。若佢執着將一切虛假嘅事當成真，閱讀經文亦只會枉費心神，比喻為食咗一張畫上大餅嘅畫紙，難以充飢之餘亦難吞下。籤文係咪同時勸中出羊子讓路畀陳雲，避免攬炒呢？