政情：大晒「舊」照 連任成疑
立法會新界東補選同去年區議會選舉，結果都反映社會渴求新舊交替，希望新一代可以為議會帶來改變。正所謂「有人辭官歸故里，有人漏夜趕科場」，喺不少政黨組織部署搶攻九月立法會選舉之際，曾經做過「三料議員」包括區議會、區域市政局、立法局（會）議員嘅人民力量陳偉業（大舊），最近就整理緊多個辦事處嘅陳年舊相，言談間更流露去意，莫非大舊打算響應換代呼聲，今年急流勇退？
開始整理各辦事處物品
近年本土派急速冒起，喺剛過去嘅立法會新界東補選中，雖然本土民主前線梁天琦落敗，但得票率達一成半，可預見九月立法會選舉競爭將會非常激烈。另一方面，自八五年進身區議會、八六年出任區域市政局議員、九一年開始擔任立法局議員嘅大舊，最近曾經放風唔再競逐連任。雖然佢事後改口，話適當時候先公布係咪繼續參選，但佢最近就開始整理各辦事處嘅物品，仲將部分舊相送畀相關議員，似乎係唔再參選嘅先兆。
「三料議員」打滾近30年
於議會打滾近三十年嘅大舊，仕途並非一帆風順，○四年以獨立身份參選一度陷入出局邊緣，最終以三萬六千多票取得新界西最後一席。到○八年掛起社民連牌頭出選，亦僅以三萬二千多票取得尾席。及至一二年立法會選舉，就以四萬四千多票順利取得議席，重拾聲威。
至於大舊整理嘅一堆陳年舊相，唔少具有珍藏價值，其中一張係九六年佢企喺青馬大橋地盤上拍攝，相信唔係太多人可以影到。另一張就係九十年代所拍攝，當年仲係民主黨成員嘅佢，聯同劉慧卿、李華明、張炳良等人喺新華社外街頭抗爭。大舊話，呢批相片喺不同地區嘅辦事處拎返立法會辦公室，由於已經積壓到幾箱相片，所以最近忙於整理，部分相片就掃瞄存放喺電腦。至於一啲重複嘅相，佢就轉送畀其他相關議員，睇來要好好收藏至得喇！