中環出更：潮遊太空 「超」越自我
福建社團聯會青委同潮屬社團總會青委早前喺北角一間福建菜館舉辦春節聚會，福建青委主任林智彬（Lawrence）、前主任黃楚恒（Stanley）同潮屬青委主席張俊勇等幾十名兄弟姊妹齊出席。出年去太空旅遊嘅Sinomax寢具生產商盛諾集團總經理林仕超（Ken）亦有現身。咪以為Ken已玩遍地球先至挑戰太空，其實佢唔係特別鍾意旅行，仲自爆畏高添！
Ken話，今次旅程只係穿越地球與太空之間嘅「卡門線」，並未穿過大氣層，停留五、六分鐘後就返地球，全程只係個幾鐘，所以對參與者體能要求唔似太空人咁嚴格，一般健康嘅人都可以參加，但價錢唔平，要一百七十幾萬元。佢間家族公司係贊助商，加上太空旅遊搞手係佢好友，所以今次旅行係寓娛樂於工作。Ken嘅妺妹Pauline就呻話，下次有機會佢都好想去試吓喎！
在場仲有百仁基金副會長楊華勇、潮州商會會董劉文文同靚女心理學家林玥彤（Candice）等人。Candice話，港人嘅情緒健康問題日益普遍，佢嘅客人之中都有唔少小朋友，故此奉勸港人唔好太睇重物質及名利。
林智彬入股鐘錶界
講到壓力，面對淡市嘅商界壓力一定唔細，但Lawrence就開心晒，事關佢最近入股港產陀飛輪萬希泉做股東，因為佢做萬希泉嘅台灣同福建代理多年，見到市場潛力好大，所以索性投資做股東，希望喺事業上闖出一片新天地。
卓妮