白居易《長恨歌》有句：「漁陽鼙鼓動地來，驚破霓裳羽衣曲」；大意是安祿山叛軍的戰鼓聲震天動地，沉浸在歌舞美色中的君臣被驚呆了！
日前，立法會財委會加開會議審議高鐵工程追加撥款，無奈反對派拉布叫囂，整個會議恍如古戰場，有人坐上主席位，有人佔領主席台，整個立法會亂過亂葬崗，最終會議在一片吵鬧聲中不歡而散，睇怕即便三月加開會議，是否能通過撥款依然凶多吉少，工程隨時有爛尾危機，正是「拉布叫囂動地來，驚破高鐵完工夢」！
列為十大基建之一的高鐵，可謂「好事多磨」，從一開始已經諸多阻滯，二○一○年萬人包圍立法會，依然無法阻擋六百六十九億元高鐵工程項目，由○七年至今年，整個高鐵工程一再延誤、超支；二○一五年五月立法會交通事務委員會主席田北辰踢爆高鐵「一地兩檢」未解決，或令高鐵無法如期通車，形容冇「一地兩檢」——所謂「高鐵」，仲衰過直通車，廣深港高鐵香港段只不過二十六公里，造價達八百四十四億元，平均每公里超過三十二億，可謂天價！
政府的「十大基建」，像中港深機場鐵路合作胎死腹中，還落得冇眼屎乾淨盲，其餘基建無一不阻滯重重；當年特首曾蔭權好大喜功，一味吹水十大基建落成可為香港創造逾一千億元的增加值，及逾二十五萬個就業機會云云。其時，有學者便指出，十大基建同時推出，致項目互相爭奪資源，出現「打樁機又要爭，鑽掘機又要爭」的情況，加上政府一個工程需多個部門審批，行政程序拖慢進度，形容「自己卡死自己」；可惜，廟堂之上，朽木為官，一切好事都變成壞事！若然高鐵真係爛尾，港鐵取消派息事小，七千多名工人飯碗不保事大！而納稅人嘅錢，就咁成千億倒咗落鹹水海！你話幾咁折墮冤枉啊！