政情：「為」健康 戒酒兼減磅
過年應酬多，加上有各式各樣嘅賀年食品非常吸引，唔少人都會不自覺食多咗仲重咗幾磅。不過，早前我哋見到前海管理局香港事務首席聯絡官洪為民（Witman），佢就反而清減咗喎，唔通過年忙得滯？原來Witman早前睇過中醫，並聽勸喻開始戒酒，一個月就減咗十磅，成效好顯著。
盼吸引更多專才到前海
洪為民話，早在個幾月前，有次連續兩晚要飲酒應酬，翌日諗住睇吓中醫清清腸胃調理吓身體，點知中醫一見到佢就耍手擰頭，語重心長好認真話，再咁落去好快就見佢唔到喎！中醫又下令佢即刻戒酒，佢見事態嚴重梗係要聽中醫講啦，誰知戒咗一個月酒之後仲有意外收穫，估唔到咁短時間內就瘦咗十磅。
講起前海嘅發展狀況，洪為民就話希望二○二○年可以達到六十五萬就業人口和十五萬居住人口，並吸引更多專業人才到前海發展，例如會計師等。現時佢每周大約去前海工作四天，但每次都盡量即日來回，晚上與親友聚會。